ប្រែសម្រួល៖ ស្រីនិច
ទីក្រុងប្រុចសែល៖ កាណាដាមានបំណងពង្រឹងទំនាក់ទំនងសេដ្ឋកិច្ចជាមួយសហភាពអឺរ៉ុប និងការពារវិធានពាណិជ្ជកម្មសកល ជាការឆ្លើយតបទៅនឹងការគំរាមកំហែងដាក់ពន្ធនាំចូលរបស់សហរដ្ឋអាមេរិក នេះបើយោងតាមការថ្លែងប្រាប់កាសែត Reuters របស់រដ្ឋមន្ត្រីពាណិជ្ជកម្មកាណាដា លោកស្រី Mary Ng កាលពីថ្ងៃសៅរ៍ (ថ្ងៃទី៨ ខែកុម្ភៈ)។
សហភាពអឺរ៉ុប និងកាណាដា បានទទួលផលប្រយោជន៍ពីកិច្ចព្រមព្រៀងពាណិជ្ជកម្មសេរីចាប់តាំងពីឆ្នាំ២០១៧ ដែលបានជំរុញពាណិជ្ជកម្មទ្វេភាគីឡើងដល់ ៦៥ ភាគរយ និងបានបង្កើតភាពជាដៃគូលើវត្ថុធាតុដើមនៅឆ្នាំ២០២១។
លោកស្រី Ng បានជួបប្រជុំជាមួយប្រធានផ្នែកពាណិជ្ជកម្មសហភាពអឺរ៉ុប លោក Maros Sefcovic ក្នុងអាហារថ្ងៃត្រង់នៅថ្ងៃសៅរ៍ បន្ទាប់ពីបានជួបជាមួយលោកស្រី Ngozi Okonjo-Iweala អគ្គនាយិកានៃអង្គការពាណិជ្ជកម្មពិភពលោកនៅទីក្រុងហ្សឺណែវ កាលពីថ្ងៃសុក្រ។
“កិច្ចព្រមព្រៀងពាណិជ្ជកម្មគឺជារឿងមួយ ហើយយើងបានឃើញតួលេខល្អប្រសើរណាស់ ប៉ុន្តែតើយើងអាចធ្វើអ្វីបន្ថែមទៀតដើម្បីជួយអាជីវកម្មកាណាដាឱ្យចូលទៅក្នុងប្រទេសសមាជិកទាំង២៧… និងតើយើងអាចធ្វើអ្វីបន្ថែមទៀតដើម្បីឱ្យមានលក្ខណៈដូចគ្នានេះនៅក្នុងប្រទេសកាណាដា” លោកស្រី Ng បានមានប្រសាសន៍។
លោកស្រីបានបញ្ជាក់ថា ធាតុរ៉ែសំខាន់ៗ និងអាជីវកម្មខ្នាតតូច នឹងស្ថិតក្នុងចំណោមផ្នែកដែលត្រូវផ្តោតការយកចិត្តទុកដាក់ជាមួយសហភាពអឺរ៉ុប។ សហភាពអឺរ៉ុបមានបំណងចង់បង្កើតភាពជាដៃគូដើម្បីធានាការផ្គត់ផ្គង់លោហធាតុដែលសំខាន់សម្រាប់ការផ្លាស់ប្តូរថាមពល ដូចជា កូបាល់ លីចូម និងនីកែល ដើម្បីកាត់បន្ថយការពឹងផ្អែកលើប្រទេសចិន។
កាណាដាក៏កំពុងជំរុញការធ្វើពិពិធកម្មការនាំចេញរបស់ខ្លួន និងបានដាក់គោលដៅក្នុងឆ្នាំ២០១៨ ក្នុងការបង្កើនការនាំចេញទៅកាន់ប្រទេសក្រៅពីសហរដ្ឋអាមេរិកឱ្យបាន ៥០ ភាគរយត្រឹមឆ្នាំ២០២៥។ លោកស្រី Ng បានថ្លែងថា ប្រទេសកាណាដាកំពុងមានដំណើរការល្អឆ្ពោះទៅសម្រេចបាន ឬលើសពីគោលដៅនេះ។
កាណាដាបានចុះកិច្ចព្រមព្រៀងពាណិជ្ជកម្មជាមួយឥណ្ឌូនេស៊ីកាលពីខែធ្នូ និងជាមួយអេក្វាទ័រកាលពីសប្តាហ៍មុន ហើយកំពុងជំរុញយ៉ាងខ្លាំងក្នុងតំបន់ឥណ្ឌូប៉ាស៊ីហ្វិក។ រដ្ឋមន្ត្រីកំពុងដឹកនាំគណៈប្រតិភូដែលរួមមានអាជីវកម្មជាង២០០ ទៅកាន់ប្រទេសអូស្ត្រាលី សិង្ហបុរី និងប្រ៊ុយណេនៅសប្តាហ៍ក្រោយ។
“យើងកំពុងចរចាជាមួយប្រទេសនានាក្នុងតំបន់អាស៊ីអាគ្នេយ៍ ពោលគឺសមាគមប្រជាជាតិអាស៊ីអាគ្នេយ៍។ ខ្ញុំបានដឹកនាំគណៈប្រតិភូអាជីវកម្មកាណាដាដ៏ធំមួយទៅកាន់ប្រទេសហ្វីលីពីនកាលពីខែធ្នូ ទៅកាន់ឥណ្ឌូនេស៊ី និងទៅកាន់ទីផ្សារដូចជាវៀតណាម ម៉ាឡេស៊ី ជប៉ុន និងកូរ៉េ” លោកស្រី Ng បានបន្ថែម។
ទីក្រុងអូតាវ៉ាបានគំរាមដាក់ពន្ធតបត និងចាត់វិធានការផ្លូវច្បាប់ប្រឆាំងនឹងសហរដ្ឋអាមេរិក បន្ទាប់ពីប្រធានាធិបតី Donald Trump បានប្រកាសដាក់ពន្ធលើកាណាដា និងម៉ិកស៊ិកកាលពីមួយសប្តាហ៍មុន និងមុនពេលលោកបានផ្អាកការអនុវត្តរយៈពេល៣០ថ្ងៃ។ លោកស្រី Ng បានថ្លែងថា កាណាដាអាចប្តឹងតវ៉ាទីក្រុងវ៉ាស៊ីនតោនទៅអង្គការពាណិជ្ជកម្មពិភពលោក ប្រសិនបើមានការដាក់ពន្ធ។
“យើងនឹងពិចារណាគ្រប់ជម្រើសដែលមានសម្រាប់កាណាដា ព្រោះកាណាដាជាប្រទេសដែលជឿលើប្រព័ន្ធពាណិជ្ជកម្មដែលផ្អែកលើវិធាន” លោកស្រី Ng បានថ្លែង។
ប្រភព៖ Reuters/fs
